Frå fjord til fjell 2026

Ein friluftsfestival for ungdom

Frå fjord til fjell er ein gratis friluftsfestival for ungdom i 7.–10. klasse frå heile Sogn. Festivalen går over to dagar med éi overnatting i telt, og vert arrangert ved vakre Kvamsøy i Balestrand. Målet er å skape ein trygg, rusfri og inkluderande møteplass der ungdom kan oppleve meistring, fellesskap og friluftsliv.

Kven kan delta

Festivalen er open for ungdom frå kommunane Årdal, Aurland, Lærdal, Luster, Vik og Sogndal. Det er plass til om lag 100 deltakarar. Tilbodet er gratis for å sikre at alle kan delta, uavhengig av økonomisk bakgrunn.

Program og aktivitetar

Deltakarane får vere med på eit variert program med aktivitetar som dypthavsfiske, stisykling, fridykking, leirdueskyting, paintball, kanopadling, juving og triatlon. Det vert både felles samlingar og valfrie aktivitetar, slik at alle kan finne noko dei trivst med. Kveldssamling og overnatting i telt er ein viktig del av opplevinga.

Transport og utstyr

Det vert sett opp felles transport frå fleire plassar i regionen; Skjolden via Gaupne, Hafslo og Sogndal, frå Øvre Årdal via Tangen og frå Aurland via Lærdal. Meir informasjon om avgangar kjem ved påmelding. Dersom du manglar utstyr som telt eller sovepose, vil det vere mogleg å låne dette gjennom lokale ordningar.

Tryggleik og rammer

Festivalen har fokus på tryggleik og trivsel. Det er vaksne leiarar til stades under heile arrangementet, og alle aktivitetar vert gjennomført med nødvendige sikkerheitstiltak. Arrangementet er rusfritt, og det vert lagt vekt på eit inkluderande og godt sosialt miljø.

Påmelding

Påmelding opnar i løpet av våren, og det er førstemann til mølla-prinsipp. Informasjon om påmelding vert publisert på nettsida og delt gjennom skular og sosiale medium.

Vil du vere frivillig?

Frivillige er heilt avgjerande for å få til festivalen. Vi ønskjer bidrag frå både enkeltpersonar, foreldre og lokale lag og organisasjonar. Som frivillig kan du bidra med alt frå praktisk tilrettelegging og matservering til aktivitetar og vakthald. Vi samarbeider også med Sagatun vidaregåande skule, der elevar frå friluftslinja deltek som frivillige. Å vere frivillig er ein fin måte å bidra til eit positivt ungdomstilbod i regionen, samtidig som ein blir del av eit engasjert og inkluderande fellesskap. Ta gjerne kontakt dersom du ønskjer å bidra!